عاجل
الرئيسية / شعر وشعراء / دستور الحاجات

دستور الحاجات

بسم الله الرحمن الرحيم
و مبدع جديد .. عبدالله_صبري
عبد الله صبري من الشعرا اللي بجد الواحد يقرأ قصايدهم 20 مره
وتخرج من القصيده ب20 قصيده

عبد الله بيقول :

اي محاولة ضحك في بعدك
تشبه حلم ولد مستني
النبله بتاعته توقع شمس

المقطع ده انا شخصيا بحبه جدا وحافظه يمكن ده من اهم المقاطع اللي قراتها علي الاطلاق

الشاي مريض – في الغربة – بالسُّكَّر

عبدالله من الناس اللي قدروا يربطوا البساطه بالابداع بشكل ميتوصفش …

يعني مثلا وهوه بيقول :

تعرف حنان القطن م الكستور
وتدير شؤون البيت بدون غلطة
تصنع دوا للحلم لو مكسور
يطلع معاها رز بالخلطة
أمي المواد الحاكمة للدستور
صوت انتصار الحق ع السُّـلْطة
ببساطة خالص تكشف المستور
وتوزع الحرية في السَّلطة

من غير تكليف مفردات قدر يخلق كون من الجمال داخل ابياته

عبد الله بيقول

كل شاعر اصله شارع
زاد عليه الدوس نطق

قدر هنا يختصر كلام كتير جدا في بيت شعر واحد وفصل حياة الشاعر جوا اطار مدهش من 8 كلمات

عبدالله شاعر مختلف جدا … عنده دنيته الخاصه اللي مبيشاركوش فيها حد
قادر يكون 4 جدران محاوطين القصيده
مش جدار واحد بيسندها

قادر يخلق دنيا وعالم بسيط فيه اسقاطات وافكار ب100 قصيده

يعني مثلا وهوه بيقول :

وحبيبتي عيوبها جمال قمحي
وهبلها فــ عقل الكون شارة
وكاريزما سنان نجلاء فتحي
ومزايا غموض خيري بشارة
مش كل عميق عكس السطحي
ولا كل وقوف لازمُه إشارة
صخب الأيام في الأصل سكون
كام مادة اتقابلوا اتشكل كون
ومافيش أشجار كات قاصدة تكون
دواليب ومكاتب ونشارة

ممكن تلاقي عند عبدالله بعض الحاجات اللي بتتسم بالسخريه
لكن سخريه عن سخريه تفرق
سخرية عبدالله مليانه ابداع وفن

مافيش أحلام هتتحقق
مادام خطاويك بتتشقق
وعندك عقل بيدقق
في فهم الشارع البشري
حرارة حزنك الساقع
تسامي عنيك عن الشائع
وكل حضورك الرائع
كمالة فــ عالم الكُشري

ساعات بحس ان عبدالله مولود وف بقه قصيده
الشعر بالنسباله شئ سهل جدا
وده يدل علي ثقافة وتجربة الشخص ده الحقيقيه
فيه وعي غير طبيعي موجود في كتابته

وساعات انام .. اصحى اكتشف بيني وبيني كلاب حراسة
وباخاف ابص فــ وش رجلي المح سؤال :
بتاخدني ليه وياك لناس الخطوة لقلوبهم رصاصة

وكل ما اروح انافق حد
ضِلِّي يسيبني ويروَّح
أتاري لسا فينا حاجات
بتصمد مهما نتطوَّح

عبدالله صبري قصيده ماشيه علي الارض
اي انسان يقدر يتحكم في جسمه زي ما هوه هوه عايز
وعبدالله صبري قصيده وقادر يتحكم في نفسه زي ما هوه عايز

الشِّعر شِعر وحُط نقطة خلاص.
مشوار ما بين الصعب والواعر.
أسهل ما فيها انك تقول وخلاص
جربت تبقى قصيدة مش شاعر؟

مصر اللي كانت بتطبخ للتاريخ زاده
وتعزم الدنيا وتحط السحاب مرقة.
وتخوف الرعب قلوا نيابه أو زادوا
صبحت بيرعبها رسم الضحكة ع الورقة.

ويعلم الله ان الوحش في رئتي
يضيق بالكون إحساسًا وأنفاسا
وإنني فوهة البركان لو همست
روحي لقامت تذيب الأرض والماسَ
وأرشف النار والأهوال مشتعلًا
على القصيدة كي لا أفرغ الكاسَ
وإنني أفزع الشيطان في غضبي
وأكتب الشِّعرَ كي لا أقتل الناسَ

إحنا التروس و الأرض كروية
بتلف بينا و الزمن راضي
لو تحضنيني و تسكني فيا
الدنيا دي هتلف ع الفاضي

لو فضلت اتكلم عن عبدالله لواحده ممكن نتكلم عن قصيده قصيده فتره طويله جداا
عبدالله شاعر اختار الشعر والشعر اختاره
اكيد عبدالله مش عايز شهره
لكن انتوا اللي محتاجين عبدالله ومحتاجين تقرأوه … متضيعوش الكنز ده من اديكم

عبدالله عنده ديوان دلوقتي اسمه دستور الحاجات دوروا عليه واقرأو

الدوله اهي وأدي المرايه / الصوره ليه مافيهاش وطن ؟!

 #مدعى_الفن

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*