عاجل
الرئيسية / شعر وشعراء / في صحتك ياموت لـ : أشرف فايز

في صحتك ياموت لـ : أشرف فايز

في صحتك ياموت
إرفعلنا كاسك
واشرب في نخب تابوت
داس ع الحياة وداسك
في صحتك ياعصابة
وفي صحة الجبروت
ياقلوب يامتصابه
آخر دواكي الموت
والموت دا له مقادير
وعلى قد مقدورك
لو خانك التقدير
يبقى اللي حان دورك
في صحتك ياضياع
وارفعلي كاسك فوق
لدم الفقير رضاع
تسكر ٠٠ ولا بتفوق
وياغراب وحلمك هم
مع اللي يتناسب
نزلت كاسات الدم
ومين اللي هايحاسب؟
في صحتك ياحياه
بهدوؤ ومن غير صوت
دا حلم وحلمناه
وعمره ماكان الموت
في صحتك ياطريق
في صحتك ياصديق
انا حلمي حلم برئ
مقاسي ومقاسك
في صحة المنسي
م اللي على الكرسي
خايف لا يوم ترسي
والقاه في يوم داسك
في صحتك يامراكبي
يابلاد متستاهلي
عبي ياموت عبي
وابدر دموع أهلي
في صحتك يانظام
كاتم على انفاسنا
الجوع دا كسر عظام
والعيش ميأسنا
ولا سامعه يوم للندا
وزايده في عنادك
والموت كده او كده
دا وجعنا في بعادك
تعظيم سلام للقبر
وارحم مافيه ناسه
ياغرقانين ع البر
انتوا اللي تتواسوا

14446229_10154074132083892_627426707296139927_n

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*