الرئيسية / شباب قفطاوى / مقال عامي ساخر : الكلية و خالتك فوزية

مقال عامي ساخر : الكلية و خالتك فوزية

بقلم : عبذ الرحمن علي

الأب: ها هتطلع مهندس ولا دكتور؟
*نفس السؤال بتفاصيل اكتر*
الأب: ها هتطلع مهندس زي ود عمتك ولا هتطلع دكتور زي ود عمك ولا هتطلع فاشل ونرميك في اي كلية تانية؟
من هنا يبدأ المرار الطافح وياريت تيجي علي كده وبس ده في امر صيغته”لازم تجيب مجموع اكبر من عيال خالتك فوزية”
الابن:
ايه يا حج ما تصلي عالنبي!! ده انا ولدك والله اللي بتعمل فيه كده. ومتقولش ” يبني انا عارف مصلحتك كويس واحنا اكبر منك ونفهم اكتر منك” اسمعني ولو مره واحدة بالله عليك.
هو مفيش في الدنيا غير طب وهندسة والمنافسة الهبلة مع عيال خالتي عالمجموع؟ يا حج هو انا مينفعش اختار الكلية اللي نفسي فيها وشايف نفسي هبقي مبسوط وهعرف ابدع فيها؟ ولا لازم ابقي طول عمري بدرس حجات غصب عني وتبقي نفسي في حجات تاني؟ هو لازم ابقي مهندس ودكتور!! مش يمكن وده احتمال كبير ابقي مهندس او دكتور فاشل؟ مش يمكن لما تسيبني ادخل الكلية اللي نفسي فيها اجتهد فيها وتوفر مجهودك وانت بتجبرني عالمذاكرة؟ مش يمكن وده الاحتمال الاكبر اني انجح في المجال اللي اختارته لنفسي؟ مش اهم حاجة عندك اني انجح ومستقبلي يبقي كويس؟ نفسي افهم مين اللي اقنعك ان المستقبل والنجاح في طب وهندسة وبس؟الواحد بينجح في الحاجة اللي بيحبها يا حج وانا عارف انك خايف عليا وعاوز تشوفني حاجة بكره وبعده وانا كمان عاوز ابقي حاجة واشوف فرحتك بيا والله. بس انا متاكد انك مش هتشوفني مبسوط وانا بعمل حاجة غصب عني وعمري ما هفكر فيك طالما انت مفكرتش فيا واجبرتني؟
والله يا حج انا بحبك جدا وانا عارف ان كل المجتمع بيفكر كده. بس معلش اكسب ولدك ويغور المجتمع. الحقني قبل ما اروح عالقهوة مع العيال الوحشين واشرب حجات كتيير توديني في عالم وهمي اعيشه بمزاجي بدل ما انا عايش بمزاجك. امال انت فاكر هروبي من الدروس والمذاكرة والصياعة اللي انا فيها عشان انا فاشل!!! لا معلش ده عشان انت معلمتنيش المعني الحقيقي للنجاح وفشلت في تكوين شخصيتي وخليتني تابع لأوامرك.
يا حج لو سمحت علمني صح واعمل معايا بر الاولاد عشان بكره اعمل معاك بر الوالدين.
انا عارف انك تعبان وبتشقي عالفلوس ومضيع حياتك عشان مستقبلنا وانا بقولك حياتك غالية جدا ف علمنا صح عشان متبقاش ضاعت هدر.
والله يا حج نفسي افرحك ونفسي تتباهي بيا زي ما انا بتباهي بيك ويقولوا عرف يربي بدل ما يشوفوني عالقهوة ونتشتم احنا الاتنين.
ما انت عارف انه من 15 لحد 20 سن صعب واني بشوف نفسي كبرت ونفسي اخد قراراتي. فيها ايه لو ساعدتني وحسستني انك حبيبي مش عدو زي ما كل العيال بتحس.
هات كتاب في فن التربية واقراه الوقت ده مهم والله انا بترجاك تلحقني مش تساعد في تدميري.
متزعلش مني يا حج وانا اسف اني كلمتك لأول مره بصراحة وبشجاعة انت معودتنيش عليها وكبرت فيا الخوف وده غلط مش صح.
المهم يا رب تكون سمعتني وفهمت انا قصدي ايه؟
الأب: إنت عاوز جوز خالتك يقولي عيالي احسن من عيالك؟
الابن: ……………………

 

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*