عاجل
الرئيسية / شعر وشعراء / مربعات لـ ولاء الدسوقي

مربعات لـ ولاء الدسوقي

———————

ارضي بنصيبك يامقلوب
ده العمر رايح ماراجع
ماتشوفش عيشتك بمقلوب
شغل دماغك وراجع
ياللي جمالك مخبيكي
جوه عيونك سحر
واللي يصونك ماخاب بيكي
ده العشق فيكي بحر
حجر القلوب اترخي
من وجعه دمعه سال
من كتر همه اتهري
والحال يهد جبال
والله البكي مش عيب
ده مسير الوجع هيطيب
ابكي كمان وكمان
ربك دواك وطبيب
دموعي سيل غرقان
ف البحر ماله نهاية
ومطر ف الحزن حيران
مجهول ماعارف بداية
عيون الهوي بتشوف
ف وسط الغدر ف عيونهم
بس اللي جري بيطوف
ومش كل البلي لونهم
اطوي الدنيا ف جيبك
واكسر الالم بإيمانك
واوعي بغرورها تجيبك
ع الارض تكسر سنانك
اصبر لحالك وشوف
وارضي بنصيبك وارسي
ودور ف حالك وطوف
هتلاقي ف الرضي مرسي
ناول همومك لربك
وادعي وقول ياكريم
واشكي جروحك وغلبك
لحالك الله عليم

احمده ف اللي يجيلك
اصل الحياه دي مراكب
لوعرفت ان الموجه تصيبك
هتحلف يمينك ماراكب

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*