عاجل
الرئيسية / شعر وشعراء / سجال (2) شجر الهوى

سجال (2) شجر الهوى

شــجر الهوى لو هوى
يبقى العتــــاب الحــل
معرفشي غيــــره دوا
لما القــــــلوب تخــتل

(عبدالباسط سعد )
***
شجر الهوى لو مــــات
ف القلب اخضر وريده
كفايه جرحك و لومات
مدام ف حبك و اريده

لومات : جمع لومة

(المبدع : أحمد شحات )
***
عتاب الهوي بيطوف
لكل اللي كان عاشق
وعيون الهوي بتشوف
السهم ف القلوب راشق

(المبدعة : ولاء الدسوقي )
***
عتاب الهــوى محلاه
لو قلــــب حب بــجد
هيرجــع ومهــما تاه
مســـير النسيم للورد

(عبدالباسط سعد)
***
شجر الهوى لو جف
نرويه يتور تانى
كل الفروع ما تخف
يكبر و ما يعانى

(المبدع : وائل البارودي)
***
عاشق والهوي ضرو
كأن القليب مسموم
وسنين الفرح مرو
عايش حزين مهموم

(المبدعة : ولاء الدسوقي)

مالك حزينه ع الهوي
وعمره ما كان كذاب
ياما لم اتنين سوا
وقفل عليهم باب
( المبدع : كريم الحجيري )
***
قلبي عشق الهوا
نسيمه عمره ما يجرح
والقلب اللي عشق بالهوى
مش كل الايام هــ يفرح
(المبدع : حمدى دنقل)
***
يا معلمانى.. الواو
والدمع ف عنيكى
دمعك أصبح مطر
ريَّان….. يرويكى
(المبدع : الحاج نصر الأنصاري)
***
يا معلماني الضـــــــــاد
ياراوية دمي بحروفـك
من يجــرحــــــك عـاد
وانا سلاحك وانا كفوفك !
(عبدالباسط سعد )
***
العشق هايم م الهوي
جوه القليب مرساه
صار مرض مالو دوا
وكل اللي انجرح حساه
(المبدعة : ولاء الدسوقي)
***
عاشــــق والهوى أعتاب
والحب الصُح مش ساهل
مش خد ورمش واهداب
عاشــق الجــسد جـــاهل
(عبدالباسط سعد)
***
شجر الهوي عشاق
وفيه القلوب ساكنه
يكبر مع الأشواق
ويموت من الركنه
(المبدع : ابراهيم أحمد )
***
انا كنت شاري الهوى
معرفش ليه خانى
كتبلى بُعده دوا
مع أنه ف الننى
(المبدع: كريم الحجيري)
***
شجر الهوي ضلال
وياما فيه فروع مايله
مفهوش بطل وضلال
وعنو اسألو ليلي
(المبدع : ابراهيم أحمد )
***

مال الهوى سرحان
و الليل نكش ف شعره
القلب فتش و سرحان *
يمكن رجعت مشاعره
(سره حن)
(المبدع : أحمد شحات )
***
النخل مال. م الهوى
لكن براسه… شموخ
تمره بنسيمه استوى
طعمه…. يهز شيوخ
(المبدع : الحاج نصر الأنصاري)
***
شجر الهوى عطشان
ب قلوبنا نسقى فيه
دا الهجر و الحرمان
لتنين أساس بلاويه
(المبدع : وائل البارودي )

***
شجر الهوى متهان
ما حد خادم فيه
و أهو كل يوم سهران
مش لاقى مين يداويه
(المبدع : وائل البارودي )

***
والله مهما اتهان
هتفضل شموخه ليه
د الورد مهما دبل
قاعده ريحته فيه
(المبدع : كريم الحجيري )
***
شجر الهوى ف الجامعة
مليـــــان قلوب وســـهام
فى الضل فروعه جامعه
أحـــــــمد ويــــا ســـهام
(عبدالباسط سعد)
***
شجر الهوي ميال
وجواه كتير اسرار
تمشي ليه اميال
ماتحس بالمشوار
(المبدع : ابراهيم أحمد )

***

شجرالهوى الهندسة
وأعظم الاساتيذ
شجر الهوى مدرسة
واحنا أكيد تلاميذ
(عبدالباسط سعد )
***

ان قولت للهوى لاه
جرحك هينزف دم
الله في سماه وعلاه
هواكم دا اخره ندم
(المبدع : حمدي دنقل)

كتر الكلام ف. الهوى
خلى الهوى… شنقان
حتى الرياح ..كرهته
والبوم .وبو ..القردان
(المبدع \الحاج نصر الأنصاري)

شجر الهوى نغمات
سيكا وعجم نهاوند
بين القلوب نغمات
بيدوب معاها العند
(عبدالباسط سعد)

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*