عاجل
الرئيسية / شعر وشعراء / سجال (3) الصبر

سجال (3) الصبر

الصبر…. صبرين ..ياخِلِّى
والعمر…. واحد… تعيشه
الصبر ع ….الفقر… واللى
على اللى نافش لى ريشه
الحاج نصر الانصاري

***

ياصبر صبرنا
وأرضى علينا
كم راح من عمرنا
ولا اتهدينا
كريم الحجيرى

***

 الصبر بجد ع الظالم
اللي من طبعه التباته
اللي لما تموت بسببه
ما تشوفشي منه ..غير شماته

عبدالباسط سعد

***

صبرك… جميل يا بلدنا
معروفه من يوم زمانك
مصرى وأعرف حدودنا
عرفك عدوك…. وشانك

الحاج نصر الانصاري

***

اصبر لحالك وشوف
وارضي بنصيبك وارسي
ودور ف حالك وطوف
هتلاقي ف الرضي مرسي

ولاء دسوقي أبوجبل

***

صبرى ونصيبى …أسَرْنى
ولا كنت مَرَّه ….حسودى
واللى صَحَبْنى وعاشرنى
يعرفنى.. أعرف. حدودى

الحاج نصر الانصاري)

***

ناول همومك لربك
وادعي وقول ياكريم
واشكي جروحك وغلبك
لحالك الله عليم

ولاء دسوقي أبوجبل

***

لو كان ع الصبر صبرين
والعمر عدى و فات
وبدل الصبر بقى صبرين
شايلين الهم ألوفات

وائل_البارودى

***

الصبر.. أصله….. مراحل
دارسه وعارف… جذوره

واللى ما يصبرش.. يللا
يركب ركايب …..غروره

(الحاج نصر الانصاري)

***

الصبر صبرين ياخلى
والهدمه دابت رقعها
لا عم سائل لا خلى
دنيا و أدى واقعها

… لا خلى بالشطره الثالثه = لا خال لى …

واقعها … واقع وعايشينه

وائل_البارودى

***

اطوي الدنيا ف جيبك
واكسر الالم بإيمانك
اصبر ده بغرورها تجيبك
ع الارض تكسر سنانك

ولاء دسوقي ابوجبل

***

صبرين و حرمنا وهنتوب
يارب ألطف ب حالنا
و قلنا مقدر و مكتوب
نستاهل إللى جرالنا

وائل_البارودى

***

ربك سامع نداك
دايما يداوي القلوب
اصبر ربك دواك
مين غيره يمحي الذنوب

ولاء دسوقي ابوجبل

***

يا واخد الصبر عنوان
إقفل عالمعاصى باب
التوبه أشكال وألوان
وربك بيقبل إللى تاب

وائل_البارودى

***

الصبر ….ليه …سيبتوه
وشويه… روحتوا للمال
وديماً ……النفس ..بتوه
أصله…. الفلوس…. موال

.
الحاج نصر الانصارى

***

شونت صبرى جبال هم
بوزن بربعه و كمان تاره
يارب ما نسكن جبالهم
لو الدفنه جات ف مغاره

وائل_البارودى

***

 اصبر يا ولدى على الدون
وخلى …….حبالك طويله
كداب…. من ضهر ملعون
م تغشك…. دقنه الطويله

(الحاج نصر الانصاري)
،،،،،،،،،،،،،،،،،،،،،،،،،،،،،،،،،،،،
(١) الدون …السافل الذى دون الناس فى أخلاقه
(٤) الذى يظهر بمظهر المتدين وهو أبعد ما يكون عن الدين

***

راح أصبر يا دنيا و أعافر
وهنسى همومى التقيله
لو حتى هجره هسافر
لو هتقلب ضلتى ب قيله

وائل_البارودى

***

قالو خليك صبور
زي نبينا أيوب
وأرضى تبقى بور
طول ما فيها عيوب

حمدي دنقل

***

صبرنا لما الصبر منا
شاكى ولا قدرشى يصبر
ومن الله عطفه ومنا
وواجب على العبد يشكر

مصطفى أحمد

***

ان كان ع الصبر صابرين

 و سقيت منه جرونى

 لا شبعت صبر و لا صابرين –

يا ناس تعالوا جرونى ( انقذوني )

أحمد شحات

***

هنصبر على اللي جاي
وقلوبنا متنكده ؟!!
قولولي بس ازاي
نجوع ونبقى كده ؟!!
—-
عبد الباسط سعد

***

لا صبر نافع ف هم
ولا حد جاى يواسينا
خساره العتاب فيهم
بايعين وإحنا إشترينا

وائل_البارودى

***

طل الفقر بسواده
صبح الوطن عيان
ولا حد فينا عاده
سبناه لحد ما هان
—-
عبد الباسط سعد 

 

 

 

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*