عاجل
الرئيسية / شعر وشعراء / سجال (5) الزواج

سجال (5) الزواج

قرفاني من يوم جوازي
والقلب شــــــايل بلاكي
طلعت لاجـــلك جوازي
وما قدرت اسافر بلاكي

حسن يوسف

***

 ياحسن سافر بلاها

اتركها تحرص عيالك

ترتاح سنة من بلاها

والرب يلطف بحالك

عدلي هباش

 ***

كنت فاكرك طباخه
عزمت انا صحابى
طلعتينى بمساخه
و خسرتينى احبابى
—— –
كريم الحجيرى

***

أنا أكل مرتي شهد
والكل عالم بيـــه
اسأل صغير في المهد
أو رأي آدم فيه
—————–
حسن يوسف

 ***

لا الجواز نافع ولا الحب
كل يوم مشاكل
ولا زرع طالع من الحب
سيبهالك ما واكل
———
الحب 1/الود والمحبة
الحب2/الغله او الحبوب
؛؛؛؛؛:
كريم الحجيري

***

الجواز ده زي البطيخ
يا إما أقرع يا إما أحمر
سيبك من أستاذه الطبيخ
خليك في اللي وشها أحمر
………………………….
أحمر 1 : اللون
أحمر 2 : الحياء
ح . م . د . ى

***

عايز..له……. لكنه شامى
ومش…. عاجباه أسامى
طبيخها ماعدشى طعمه
زَىّْ اِلّلىْ ف …. الصوانى
********************
لكنه ..لهجه
الحاج نصر الانصاري

 ***

من يوم جوازى وثابت
للمرة والحلوة قابل
والعشرة هانت وسابت
يمين عليها ما قابل
………………………….
محسن البدرى
(ثابت) متحمل
(قابل) راضى
(سابت) تركت
(قابل) اقبل عشرتها

***

قعدت جنبك ما نافع
وللا شافع كمان حبي
يا طالبه بس المنافع
ما عدت قادر اخبي

رضا ابو الغيط

***

قالوا الجواز نص الدين
عملت ناصح قلت أكمل
من يومها كتر عليا الدين
تايه مش عارف إيه أعمل
……………………….
ح . م . د . ى

***

قالوا الجواز نص الدين
ولمه للشباب وستره
لكن اعمل ايه ياموحدين
البنات بقت محل بودره

محمد الهواري

***

ع الهنا وعدتنى
حنيتلها إيديا
شالت مكياجها خلتنى
فجأه اغمى عليا
——–
كريم الحجيرى

***

 لو لسه ع البر خليك
وخدها منى نصيحة
شوف كام خليك
خدوا قبلك الطريحة
………………………
ح . م . د . ى

 ***

كان حضن مرتي وطــن
زرعه 0 ونيل 0 وأمان
دلوقتي أصبــــح كفــن
ايه السبب يا خوان ؟
—————————
حسن يوسف

***

بدمع العين تراضــــــــــيني
بضمة قال تواســــــــــــيني
أنا وديني هاقـــــــول الحق
الحضن خلاص بقى صــيني
—————————-
عبدالباسط سعد

***

القلب ….خاين… وناكر
والحب ..كنه.. ف اجازه
ماكنت ..حامد… وشاكر
دلوقتى نفسي ف جوازه
*********************
الحاج نصر الانصاري

***

قولي لي يا بنت عمى
قلبك لساه خالي
هــ تشيلي معايا همى
أجيب أبويا وخالي
…………………..
ح . م . د . ى

*** 

لبست ..عبايه… حجازى
والحفله… بعيد… جوازى
والقلب …كنه.. م حاسس
شربان …ميه….. ارتوازى
**********************
الميه الارتوازى هى التى تخرج من باطن الارض وكانت مملحة ليست كماء النيل.
الحاج نصر الانصارى

 ***

سبع البرمبه ….فالح
ف النت ليل….. نهار
نسيها وقال. سابتنى
وبيشكى …من المرار
******************
الحاج نصر الانصاري

  ***

حـــلوه و زنانة
هــتهج من وَشَـها
للست جــمال كتير
مش بس ف وشها

عبدالباسط سعد 
وشها 1: زنها
وشها 2: وجهها

***

حلوه ….وزنانه……. لكن
طباخه ……….ست بيت
والبيت من غيرهاصحرا
حتى ان قالت…. دوبيت
*********************
الدوبيت الغناء الثنائى
الحاج نصر الانصاري

 ***

هي واحدة النتيجة
يا حلو لما تطب
أول أيام الزيجة
آخر أيام الحب

 عبدالباسط سعد

*** 

رجع السبع ف كلامه
وقال…. كلام حبيب
ولو …….تعب شويه
حيقول هى الطبيب
*******************
الحاج نصر الانصاري

 

 

لو مهرك عدا وزاد
برضو شريكى بيه
لو نزلت عشانك مزاد
مفيش غيرى هكسب فيه
——
كريم الحجيري

***

الســــت لو نـــزلت مـــزاد ترخص
ولو طلبها بالمال ميــــــت شخص
دنية وتكرهـــــــك لو قلت مـــفيش
والاصيله تـعيش وياك ع الخـص
عبدالباسط سعد

***

طول عمرى انه و اناديك

 و لبسلى احمر و كاكى

 مدام انت راجل و ديك

 روح عشك عيط و كاكى

( احمد شحات)

***

واضح كلامكم وبان زين
ياللي بتقولوا الهوايل
بتحطوا نار وبنزين
اهدوا لاعمل عمايل
****************
ولاء دسوقي أبوجبل

***

جات بعد ما بنيت وهدت
ولسؤالى خرست ما جابت
يلا ..المركب اللى ودت
أحسن من اللى جابت
………………….
محسن البدرى

***

سكتت من الصبح لماَّ
عرفت ..شوارع قليبه
وجات ..ولمالها… لمه
وهو ..غرقان ف عيبه
******************
أتريها …سلم ….وتعبان
لعبت له ….لعبه قديمه
مرات….. يعلا وفرحان
وشويه ياخد الصريمه
********************
الصريمه الحبل الذى تجر به المواشى،عافاكم الله على الرجل الذى يكون أضحوكة المرأة
★الحاج نصر الانصارى★

***

تقدروا تقولوا القول ده هو
قدام عيالكم والمدام
ده لما تشوفوهم تدهو
وتضربوا تعظيم سلام
*************
ولاء دسوقي ابوجبل

***

أنا أقدر أقول وأقــول
وهزاري دا مــــقبول
أزعلها ؟ مش معقول
دي ام العيال ســـــكر
عبدالباسط سعد

***

الست زي الارض
ترويها حنان وحب
تصون ليك العرض
وينبت فيها الـ حب
…………………
ح . م . د . ى

 أم العيال من قوص
العيلة واحدة وخالطين
العم أبدا ما من قوص ( منقوص أي ناقص )
ولا برضه خالها ،، خالطين ( خال طين )
————-
حسن يوسف

***

هي الحياه والبر
هوالسند والضهر
ف القلب صدق وبر
يدوم طوال الدهر

شادلي دنقل

***

مراتي دنيتي وتاجي
ونبراسي وراس المال
إذا ناديت لهــــا ،،، تاجي
تعدّل حِملي لو يوم مال
—————
حسن يوسف

***

احسن سجال… قاريتو
هو سجال……. .الزواج
كلامه…. ميه ف.. الميه
كله يحب ……..المزاج
********************
الحاج نصر الانصارى

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*