عاجل

هس و سكوت

وائل البارودي 

هس وسكوت

أنين البيوت

لو تسمعه وتسمع نداه

صوت الشقوق

صارخه بحرقه آه و آه

لما تشوف فاس الهدد

بتقول مدد

عايزة السند تاه الولد

لما إنبهر

بقصور مدينه ضميرها مات

جارت علي كل إللي فات

والذكريات

نسيت خلاص طيبة الجدود

باعت الحدود

باعت سنين ملهاش عدد

نسيو المديح مدد مدد

هج الحمام و للجناح فرد فرد

والمشربيه خشبها ناخ

بعد أما باخ

منظر بيوتنا الطين

قلبوه عجين بالخرسنات

وقالوا الولاد

بصوت العناد

الحي أبقي من إللي مات

ونسيوا التلات ونايب التلات

واللمه في حضن الصالات

ما الجد مات و العم مات

نسيوا الجيران وقول كمان

علي إللي كان

واللمه في الجمعه وفي نفس المكان

وريحة البخور صوت الوابور

شكل العجين ريحة الطحين

راحوا الكبار فضلوا الصغار

تاهوا الولاد

وإتفرقوا ف كل البلاد

يرحم زمان و أيام زمان

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*