عاجل
الرئيسية / شعر وشعراء / المشهدالأخير ( قصيدة عامي )

المشهدالأخير ( قصيدة عامي )

وائل البارودي

—————

وطالعه الشمس تتبسمل علي وشى
ومتمدد علي نعشي
خلاص همشي
ف أوضة غسلي ب أتطهر
و رشوا العطر بتعطر
هقابل بكرة رب كريم
حليم ورحيم
أمانه عليك يا مغسلي فالجسمان
تدفي الميه حبايه
وتعدل راسي ع القبله
وغسلني ب كبايه
تكون حبه مدفايه
وقول ل أمي يا ست الكل بكفايه
عليا نوح
دي طلعة روح
بتطلع كل ما عيونك تِنَزْل دمعه ع الجته
وكام حته
قطعتيهالي من توبك هنا فتوبي بتتوصل
وتتفصل
يزيد كفني كمان حته
قطعتيهالي لاجل تكملي كفني
ولاجل ما تكمل الدفنه
هاتيلي من تراب البيت كمان حفنه
تدفيني وأشم فيها عشرتكم
وضمتكم
وشايف جنب باب البيت كمان أختي
بتتنوح علي بختي
تسمي عالوجع فالراس
تقول يامعدد الأنفاس
عدوا له دا يمكن لسه فيه نفسين
يطلعهم هنا فحضني
شوفولي الجته لو تتباس
أبوس فيها كمان ساعتين
بقول ل أختي بلاش تبكي علي إللي مات
ده أجله فات
وإقريلي كمان أيتين
ولو مر الفراق سنتين
متنسيشي تسامحيني
يانور عيني
معشتش أملي عمرك فرح
ولا أشيل لك كمان الطرح
وأداديلك عيالك دول
وأشيل وأقول
حبيب خالو
وتاجي الخاله والعمات
بتترحم علي إللي مات
وناسي الشيب وراه فالشعر
مكملشي
دا لسه شباب ومتعايق
لحق يمشي
وشايف بنت بتقاوح علي الموته
وقالت يا الحبيب فايت كمان فوته
و مش راجع
هعيشها دنيا بمواجع
وعيالك
قاعده هناك بصالك
كفايه عليا طلتهم
وريحتك جوه فرشتهم
تعال لو نسكن العشه
وبكفايه الحصير فرشه
ومش عايزه لا جاه ولا صيت
تعاله ياريتني رحت ما جيت
وبتشاشي حريم الجيره ع الميت
يقولوا لسه دا مبيت
علي الفرشه
وكان فالضهر يتمشي
دا فالحاره
محلي الدنيا يا دي الواد علي أحبابك
وإيه نابك
من المشاوير غير الفرقه
وطالع م الحياه بمترين قماش ف قماش
وحتة شاش
يا متعايق علي الرقده
يا فاكك فالكفن عقده
يا واخد عالبراح ببراح
يا طير طاير بألف جناح
حزانه عليك فالصحبه عيال وما جوش
وراك ما مشوش
وما عرفوش
يقابلوا تربة العاشق
ولا يرمولوا نظرة وداع
وتتفارق عيونهم للولد أوجاع
تلملمهم نواصي الحته ع الجنبين
وكل بيتين بتقف بالكرب وتحن
وقلب الصحبه ليك بيئن
بتتني علي كربك
وطاير تجري علي تربك
أمانه يا ليل ما تليل علي التربه
ولا تبقي هناك للواد بلاد غربه
وهات الشمس تتبسمل علي وشه
وما تغشه
ومتكونش يا قبر غريب ع الجته
وزيد له فالوسع حته
وحنن تربتك ع الواد
و ما تهينهوش
دا مات عاشق
بس حبايبه غابوا مجوش

عن صدى قفط

اضف رد

لن يتم نشر البريد الإلكتروني . الحقول المطلوبة مشار لها بـ *

*