عاجل
الرئيسية / شعر وشعراء / ” مثالية ” شعر : سناء مصطفى

” مثالية ” شعر : سناء مصطفى

  شعر / ثناء مصطفى                                                                    الام2

 مَهِيشْ كِلْمةْ ياسِتّْ الكلّ بِتْعَبّر عَنِ الْإحْسَاسْ
ولا شهادة هِترْفع قَدْرِك السَّامي قُصَاد الناسْ
أنا يا أمّي مِلْك يمِينك الطاهرة مِن الْأَخْمُص لِشَعْر الرّاس
” مثالية ” …. وإنتي أكيد مِثَالْ لِيـّا
ومين غيرك نَقَش بالوشْم ع النّية
وعَلّمْنى أكون إنسان؟
ومين غيرك أخد م الشمس حباية
زرعها ف قلبي شباك ضيْ
يا نَـبْت الجد والجدة اللي كانوا الريْ
لكل مواسم الخضرة وخصوبة الأرض وسحر البنت ف الحواديت
يا ست البيت
يا عمدانه اللي ساندة الضهر والدراعات
أبويا انا مات لكن عايش ف أنفاسك
وف عنيكي اللي ضماني وحرساني من الغفلة ومن ذَلّةْ خطاوي كتير
أبويا أصيل
عشان اختارك انتي الزوجة واختارك تكوني الأم
واخترتي تشيلي الهم وتخبيه
لكن ف عنيكي كنت باشوف وباعمل نفسي مش شايف
لأن الضحكة على وشك بتفتح نفسي للدنيا
وانا كأناني عودتيه بيغرف من بحورك غرف
ومن لغة العطاء معرفش قيد ف النحو أو ف الصرف
بياخد بس مبيديش
لكن ومن خلق الحنان ف الكون وخلّى الأصل ف جذورك
ومتفرع بطول النيل وساقي الأرض من نورك
أنا درويش وهايم ف المدد عاشق
رضاكِ منتهى وملكوت
فسامحيني عشان قصّرت
وضميني لأني تعبت
وشاوريلي على الجنة وقوليلي خلاااااص
خلاص يا ابني
خلاص قَرّبتْ.

الام

عن على العطار

اضف رد

لن يتم نشر البريد الإلكتروني . الحقول المطلوبة مشار لها بـ *

*